Прыярытэтныя напрамкі знешняй палітыкі Рэспублікі Беларусь

Прытрымліваючыся адзіных падыходаў да развіцця адносін з усімі замежнымі партнёрамі на аснове раўнапраўнага і ўзаемапаважлівага дыялогу, Беларусь тым жа часам канцэнтруе свае знешнепалітычныя намаганні на шэрагу найбольш важных і перспектыўных вектараў.

Сярод іх – перш за ўсё Расійская Федэрацыя, стратэгічнае саюзніцкае ўзаемадзеянне з якой будуецца на аснове Дагавора аб стварэнні Саюзнай дзяржавы Беларусі і Расіі.

Адносіны ўсепагоднага і ўсебаковага стратэгічнага партнёрства развіваюцца з Кітайскай Народнай Рэспублікай.

Паслядоўна адстойваючы ідэі інтэграцыі, Беларусь займае актыўную і канструктыўную пазіцыю ў аб'яднальных утварэннях на постсавецкай прасторы – Еўразійскім эканамічным саюзе, Садружнасці Незалежных Дзяржаў, Арганізацыі Дагавора аб калектыўнай бяспецы.

Новыя магчымасці для развіцця кантактаў і рознабаковага ўзаемадзеяння, умацавання беларускіх пазіцый на сусветнай арэне адкрыліся пасля атрымання Рэспублікай Беларусь у 2024 годзе статусаў паўнапраўнага члена Шанхайскай арганізацыі супрацоўніцтва і партнёра БРІКС.

На якасна новы ўзровень выведзена і працягвае актыўна развівацца рознабаковае ўзаемадзеянне з краінамі Азіі, Афрыкі і Лацінскай Амерыкі.

На фоне беспрэцэдэнтнага палітычнага і эканамічнага ціску заходніх краін на Беларусь адносіны з імі трансфармаваліся з партнёрскіх і ўзаемавыгадных у жорсткае супрацьстаянне. Разам з тым Беларусь застаецца адкрытай да дыялогу з мэтай аднаўлення раўнапраўнага ўзаемавыгаднага супрацоўніцтва, у першую чаргу ў гандлёва-эканамічнай і інвестыцыйнай сферах.

Важным напрамкам знешнепалітычнай актыўнасці Беларусі з'яўляецца шматбаковая дыпламатыя. Наша краіна робіць свой унёсак у вырашэнне глабальных праблем, процідзеянне сучасным выклікам і пагрозам, традыцыйна актыўна ўдзельнічае ў дзейнасці ААН і іншых міжнародных арганізацый, генерыруе падыходы і ініцыятывы, якія садзейнічаюць дыялогу і пераадоленню раздзяляльных ліній у міжнародных адносінах.