Прынцыпы, мэты і задачы Рэспублікі Беларусь на міжнароднай арэне

Асноўныя прынцыпы, мэты і задачы знешняй палітыкі Беларусі заканадаўча замацаваны ў Канстытуцыі Рэспублікі Беларусь, Канцэпцыі нацыянальнай бяспекі Рэспублікі Беларусь, Законе «Аб зацвярджэнні Асноўных напрамкаў унутранай і знешняй палітыкі Рэспублікі Беларусь» ад 14 лістапада 2005 г. № 60-З, іншых заканадаўчых актах.

Рэспубліка Беларусь у сваёй знешняй палітыцы зыходзіць з прынцыпаў роўнасці дзяржаў, непрымянення сілы або пагрозы сілай, непарушнасці меж, мірнага ўрэгулявання спрэчак, неўмяшання ва ўнутраныя справы і іншых агульнапрызнаных прынцыпаў і нормаў міжнароднага права.

Стратэгічнымі мэтамі знешняй палітыкі нашай краіны з'яўляюцца:

• абарона дзяржаўнага суверэнітэту і тэрытарыяльнай цэласнасці Рэспублікі Беларусь;
• абарона правоў, свабод і законных інтарэсаў грамадзян, грамадскіх і дзяржаўных інтарэсаў.

Рэспубліка Беларусь прыхільная шматвектарнай знешняй палітыцы, якая прадугледжвае ўмацаванне адносін са стратэгічнымі саюзнікамі і партнёрамі, развіццё дружалюбных, прагматычных і ўзаемавыгадных сувязей з іншымі дзяржавамі ў розных рэгіёнах свету, якія выказываюць гатоўнасць да супрацоўніцтва, прыярытэтнае прасоўванне беларускіх эканамічных і гандлёвых інтарэсаў.

Знешнепалітычная дзейнасць Беларусі, у прыватнасці, накіравана на фарміраванне па перыметры знешніх меж нашай краіны пояса добрасуседства, адаптаванага да зменаў геапалітычнай і ваенна-стратэгічнай сітуацыі ў рэгіёне, процідзеянне прымяненню ў міжнароднай практыцы эканамічных, палітычных і іншых мер прымусовага характару, рашучае адстойванне нацыянальных інтарэсаў у рамках міжнародных арганізацый, аб'яднанняў і саюзаў, умацаванне пазіцый гэтых структур у сістэме міжнародных адносін.