Аб сустрэчы Міністра замежных спраў Беларусі М.Рыжанкова з фіналістамі конкурсу «Хачу быць дыпламатам»

30 красавіка 2025 г. Міністр замежных спраў Беларусі Максім Рыжанкоў сустрэўся ў фармаце гутаркі за круглым сталом са студэнтамі - фіналістамі конкурсу эсэ-работ "Хачу быць дыпламатам".

На суд журы было прадстаўлена больш за 220 конкурсных заявак з 20 вышэйшых навучальных устаноў краіны. З іх 17 сталі пераможцамі, уключаючы спецыяльныя прызы Міністра замежных спраў і суарганізатара конкурсу - сеткі магазінаў "5 элемент", 16 лаўрэатамі.

Фіналістаў конкурсу віталі і ўзнагароджвалі Міністр замежных спраў Максім Рыжанкоў, дырэктар РУП "Нацыянальны цэнтр маркетынгу і кан'юнктуры цэн" Мікалай Барысевіч, старшыня агульнага сходу акцыянераў сеткі магазінаў "5 элемент" Андрэй Балабін.

Усім пераможцам і лаўрэатам уручылі каштоўныя падарункі, але галоўным прызам стала магчымасць прайсці практыку ў МЗС або прыняць удзел у штогадовым семінары-практыкуме для маладых дыпламатаў.

Сярод пераможцаў студэнты першага, другога, трэцяга, чацвёртага курсаў факультэтаў міжнародных адносін, ваеннага, гістарычнага і юрыдычнага факультэта Беларускага дзяржаўнага ўніверсітэта, Беларускага дзяржаўнага эканамічнага ўніверсітэта, Мінскага дзяржаўнага лінгвістычнага ўніверсітэта, Акадэміі кіравання пры Прэзідэнце Рэспублікі Беларусь, Беларускай дзяржаўнай акадэміі авіяцыі, Беларускага дзяржаўнага ўніверсітэта культуры і мастацтваў, Брэсцкага дзяржаўнага ўніверсітэта імя А.С.Пушкіна, Віцебскага дзяржаўнага ўніверсітэта імя П.М.Машэрава, Гомельскага дзяржаўнага ўніверсітэта імя Ф.Скарыны, Гродзенскага дзяржаўнага ўніверсітэта імя Я.Купалы, Полацкага дзяржаўнага ўніверсітэта імя Ефрасінні Полацкай, Беларускай дзяржаўнай ордэнаў Кастрычніцкай Рэвалюцыі і Працоўнага Чырвонага Сцяга сельскагаспадарчай акадэміі, Міжнароднага ўніверсітэта "МІПСА", БІП - Універсітэта права і сацыяльна-інфармацыйных тэхналогій.

У мерапрыемстве таксама прыняў удзел Надзвычайны і Паўнамоцны Пасол, член Асацыяцыі ветэранаў МЗС Аляксандр Авяр'янаў.

У сваім выступе Міністр падкрэсліў, што дыпламатыя - гэта не проста прафесія, а стыль жыцця, форма служэння Радзіме і яе нацыянальным інтарэсам. «Шлях у дыпламатыю пачынаецца не адразу з замежных камандзіровак і афіцыйных візітаў. Ён пачынаецца тут і цяпер - з актыўнай жыццёвай пазіцыі, удзелу ў грамадска значных справах, імкнення прыносіць карысць людзям», - адзначыў Міністр.

М.Рыжанкоў акцэнтаваў, што адметнай рысай эсэ, якія паступілі на конкурс МЗС, былі не толькі глыбіня думкі і сталасць поглядаў, але і непадробная любоў да Радзімы і жаданне адстойваць і прасоўваць яе інтарэсы ў розных сферах жыцця грамадства. Міністр асабліва адзначыў упадабаную яму ў адной з конкурсных работ ацэнку дыпламатычных служачых, працытаваўшы наступны радок: "жадаю ўступіць у атрад інтэлектуальных салдат".

версія для друку