Аб удзеле намесніка Міністра замежных спраў Беларусі І.Сякрэты у міжнароднай канферэнцыі, прымеркаванай да 40-й гадавіны аварыі на Чарнобыльскай АЭС

24 красавіка 2026 г. намеснік Міністра замежных спраў Рэспублікі Беларусь Ігар Сякрэта ўзяў удзел у міжнароднай канферэнцыі, прымеркаванай да 40-й гадавіны аварыі на Чарнобыльскай АЭС: «40 гадоў пасля Чарнобыля: вынікі», якая адбылася на базе Адукацыйнага цэнтра бяспекі жыццядзейнасці МНС.

Ва ўступным слове на пленарным пасяджэнні І.Сякрэта адзначыў, што Беларусь не проста перажыла катастрофу, а стала краінай-экспертам, лакаматывам міжнароднага супрацоўніцтва па пераадоленні наступстваў радыяцыйных аварый.

Намеснік Міністра пацвердзіў, што Беларусь заўсёды дзялілася і гатовая далей дзяліцца назапашаным вопытам з міжнароднай супольнасцю, з усімі дзяржавамі і арганізацыямі, адкрытымі для канструктыўнага дыялогу, робячы ўнёсак у глабальныя намаганні па пераадоленні наступстваў тэхнагенных катастроф.

І.Сякрэта звярнуў асаблівую ўвагу на тое, што, нягледзячы на ўсе ўрокі чарнобыльскай аварыі, працягваецца палітызацыя чарнобыльскага дасье, якая блакуе вырашэнне канкрэтных пытанняў, абмяжоўвае доступ да тэхнічнай дапамогі і ў цэлым негатыўна ўплывае на развіццё пацярпелых рэгіёнаў.

Намеснік Міністра падкрэсліў, што ва ўмовах нарастальнага крызісу глабальнага кіравання патрэбныя новыя правілы міжнародных зносін, пры якіх гуманітарнае супрацоўніцтва па вызначэнні знаходзіцца па-за палітыкай, каб чарнобыльская тэма не была закладнікам геапалітычных рознагалоссяў і палітызацыі.

У заключэнне І.Сякрэта выказаў упэўненасць, што канферэнцыя зробіць варты ўнёсак у высакародныя намаганні па ўдасканаленні мер, накіраваных на прадухіленне падобных катастроф, абмен вопытам і тэхналогіямі для забеспячэння бяспекі ядзерных аб'ектаў і абароны здароўя насельніцтва па ўсім свеце.

версія для друку