Памер шрыфта:

Арганізацыя па бяспецы і супрацоўніцтве ў Еўропе

Арганізацыя па бяспецы і супрацоўніцтве ў Еўропе (АБСЕ) з’яўляецца буйнейшай рэгіянальнай арганізацыяй, у склад якой уваходзяць 57 дзяржаў Еўропы, Цэнтральнай Азіі і Паўночнай Амерыкі.

Мандат АБСЕ ахоплівае шырокі круг пытанняў у рамках ваенна-палітычнага, эканоміка-экалагічнага і чалавечага вымярэнняў. Рашэнні ў АБСЕ прымаюцца на аснове кансэнсусу, усе дзяржавы-ўдзельніцы маюць аднолькавы статус.

Усеабдымны падыход АБСЕ да пытанняў бяспекі і шырокі склад удзельнікаў робяць Арганізацыю важным і ўнікальным міжнародным форумам для палітычнага дыялогу.

Рэспубліка Беларусь з'яўляецца паўнапраўнай дзяржавай-удзельніцай АБСЕ з 30 студзеня 1992 г. Пачынаючы з 1992 года ў г.Вене (Аўстрыя) дзейнічае Пастаяннае прадстаўніцтва Рэспублікі Беларусь пры АБСЕ.

Беларусь актыўна ўдзельнічае ў дзейнасці асноўных і дапаможных органаў АБСЕ – Пастаяннага савета (ПС) і яго камітэтаў, Форуму па супрацоўніцтве ў сферы бяспекі (ФСБ), а таксама Сумеснай кансультатыўнай групы (СКГ) і Кансультатыўнай камісіі па адкрытым небе (ККАН) – перагаворных органаў па Дагаворы аб звычайных узброеных сілах у Еўропе і Дагаворы па адкрытым небе, адпаведна.

Беларускія прадстаўнікі працуюць у Сакратарыяце ў г.Вене, інстытутах і палявых місіях АБСЕ, уключаючы Спецыяльную маніторынгавую місію (СММ) ва Украіне. З ліпеня 2016 г. прадстаўнік Беларусі Н.І.Дрозд узначальвае Офіс АБСЕ ў Ашхабадзе.

Знакавым мерапрыемствам, якое адлюстроўвае прызнанне і ролю Беларусі ў АБСЕ, стала міжнародная канферэнцыя “Прадухіленне і барацьба з тэрарызмам у лічбавую эпоху”, праведзеная ў г.Мінску (9-10 кастрычніка 2018 г.) пад эгідай АБСЕ. Падобнае мерапрыемства высокага ўзроўню ўпершыню было арганізавана ў Беларусі па лініі Арганізацыі і атрымала станоўчы міжнародны рэзананс.

Дэлегацыя Нацыянальнага сходу Рэспублікі Беларусь прымае ўдзел у працы Парламенцкай асамблеі (ПА) АБСЕ. Па ініцыятыве Беларусі прыняты рэзалюцыі Асамблеі па тэматыцы барацьбы з гандлем людзьмі, новых і аднаўляльных крыніц энергіі, “зялёнай” эканомікі, прасоўвання сацыяльна-эканамічных правоў, рэагавання на з'яўленне новых псіхаактыўных рэчываў, лічбавай эканомікі ў рэгіёне АБСЕ, стратэгічнага прагназавання ў галінах навукі, тэхналогій і інавацый для ўстойлівага развіцця.

У ліпені 2017 г. штогадовая сесія ПА АБСЕ ўпершыню прайшла ў г.Мінску. Мерапрыемства адкрыў Прэзідэнт Рэспублікі Беларусь. 

29–30 красавіка 2019 г. у г.Мінску адбылася міжнародная канферэнцыя Групы падтрымкі Шаўковага шляху ПА АБСЕ “Адзін пояс, адзін шлях: паглыбленне супрацоўніцтва дзеля ўстойлівага развіцця і росквіту”, арганізаваная па ініцыятыве Нацыянальнага сходу Рэспублікі Беларусь. Па выніках канферэнцыі была прынята Мінская дэкларацыя.

Рэспубліка Беларусь ажыццяўляе ўзаемадзеянне з профільнымі інстытутамі АБСЕ – Бюро па дэмакратычных інстытутах і правах чалавека (БДІПЧ), Прадстаўніком па пытаннях свабоды СМІ, а таксама з Сакратарыятам АБСЕ, уключаючы Каардынатара эканамічнай і экалагічнай дзейнасці і Спецпрадстаўніка / Каардынатара АБСЕ па пытаннях барацьбы з гандлем людзьмі.

У 2019 годзе праведзены візіты ў Беларусь Прадстаўніка па пытаннях свабоды СМІ А.Дэзіра (сакавік), старшыні ПА АБСЕ Г.Цэрэтэлі (красавік), генеральнага сакратара АБСЕ Т.Грэмінгера (верасень). У лютым 2020 г. Мінск наведала дырэктар БДІПЧ І.Гісладоцір. 

Развіваецца прамое супрацоўніцтва Беларусі з Сакратарыятам і інстытутамі АБСЕ па рэалізацыі сумесных праектаў у такіх сферах, як ахова навакольнага асяроддзя, правы чалавека, вяршэнства права і гендэрная роўнасць.

4–6 снежня 2019 г. беларуская дэлегацыя на чале з Міністрам замежных спраў У.У.Макеем узяла ўдзел у 26-й штогадовай сустрэчы Савета міністраў замежных спраў (СМЗС) дзяржаў-удзельніц АБСЕ ў г.Браціславе (Славакія).

Па выніках нефармальнай сустрэчы кіраўнікоў МЗС дзяржаў-членаў АДКБ на СМЗС была ўхвалена сумесная заява аб фарміраванні адзінай і непадзельнай прасторы бяспекі. У фармаце АДКБ таксама была ўзгоднена ініцыяваная Беларуссю і Расіяй Дэкларацыя аб 75-годдзі Перамогі ў Другой сусветнай вайне, да якой далучыліся Азербайджан, Малдова, Сербія, Туркменістан і Узбекістан.

Беларусь традыцыйна падтрымлівае ператварэнне АБСЕ ў паўнавартасную і эфектыўную арганізацыю, якая дзейнічае ў інтарэсах усіх дзяржаў-удзельніц на аснове іх суверэннай роўнасці, садзейнічае развіццю супрацоўніцтва і ўмацаванню бяспекі на еўраатлантычнай прасторы.

Рэспубліка Беларусь паслядоўна выступае за павышэнне патэнцыялу АБСЕ ў галіне ўрэгулявання канфліктаў. Пачынаючы з 2014 года, Беларусь аказвае неабходнае садзейнічанне ў працэсе ўрэгулявання ўкраінскага крызісу, у тым ліку шляхам прадастаўлення пляцоўкі для правядзення рэгулярных пасяджэнняў Трохбаковай кантактнай групы і яе рабочых падгруп, падтрымлівае дзейнасць Спецыяльнай маніторынгавай місіі АБСЕ ва Украіне.

Дыпмісіі Беларусі за мяжой

Усе дыпмісіі Замежныя дыпмісіі ў Беларусі
Перайсці

Відэа МЗС

Aрхіў

Афіцыйныя інтэрнэт-рэсурсы