Аб адкрыцці «Міжнароднага квартала» ў рамках XXXII Мінскай міжнароднай кніжнай выстаўкі-кірмашу
13 сакавіка 2025 г.
13 сакавіка 2025 г. адбылася цырымонія ўрачыстага адкрыцця «Міжнароднага квартала» на палях XXXII Мінскай міжнароднай кніжнай выстаўкі-кірмашу. Удзел у мерапрыемстве прынялі намеснік Міністра замежных спраў Рэспублікі Беларусь Павел Уцюпін, Першы намеснік Міністра інфармацыі Рэспублікі Беларусь Андрэй Кунцэвіч, кіраўнікі акрэдытаванага ў нашай краіне дыпламатычнага корпуса.
Асаблівасцю сёлетняй кніжнай выстаўкі стала арганізацыя інтэрактыўнага калектыўнага стэнда дзяржаў – членаў Еўразійскага эканамічнага саюза: Арменіі, Беларусі, Казахстана, Кыргызстана і Расіі.
Як адзначыў у сваім выступе намеснік Міністра замежных спраў П.Уцюпін, цырымонія адкрыцця «Міжнароднага квартала» – адно з першых маштабных мерапрыемстваў у рамках старшынства Рэспублікі Беларусь у органах ЕАЭС у 2025 годзе.
Аб’яднальнай тэматыкай кніжнай выстаўкі стала 80-годдзе Вялікай Перамогі. Намеснік Міністра замежных спраў падкрэсліў важнасць захавання і перадачы будучым пакаленням гістарычнай памяці аб Вялікай Айчыннай вайне. «Я ўпэўнены, што адным з лепшых спосабаў гэтай перадачы з’яўляецца добрая кніга пра тыя падзеі», – адзначыў П.Уцюпін.
Усяго ў гэтым годзе ўдзел у Мінскай міжнароднай кніжнай выстаўцы-кірмашы прынялі больш за 20 дзяржаў.
