Інтэрв'ю Генеральнага консула Беларусі ў г.Хашымін Р.Варанкова штодзённай газеце “Thanh Nien” (24 красавіка 2024 г.)

У В'етнама і Беларусі ёсць яшчэ вялікі патэнцыял для супрацоўніцтва

Генеральны консул Беларусі ў Хашыміне Руслан Варанкоў распавёў газеце « Thanh Nien » аб дасягненнях і патэнцыяле супрацоўніцтва паміж Мінскам і Хашымінам, у прыватнасці, а таксама паміж В'етнамам і Беларуссю ў цэлым.

Моладзевыя абмены
Разглядаючы вехі ў дыпламатычных адносінах паміж дзвюма краінамі, Генеральны консул Варанкоў нагадаў, што абодва бакі здзейснілі сотні візітаў на высокім узроўні, у тым ліку, тры візіты дзяржаўнага ўзроўню з кожнага боку. Абедзве краіны супрацоўнічаюць у многіх галінах, такіх як: адукацыя, навука, тэхналогіі, культура, спорт, турызм і моладзевыя абмены. «Беларусь і В'етнам падпісалі больш за 100 пагадненняў, рэалізуюць шмат гандлёвых і інвестыцыйных праектаў. Акрамя таго, абодва бакі падтрымліваюць адзін аднаго на міжнародных пляцоўках» – сказаў Руслан Варанкоў.

Што тычыцца моладзевых абменаў паміж дзвюма краінамі, спадар Варанкоў адзначыў, што гэта адзін з важных напрамкаў двухбаковага ўзаемадзеяння. Дыпламат прывёў гістарычны факт, што Беларускі рэспубліканскі саюз моладзі (БРСМ) і Камуністычны саюз моладзі Хашыміна маюць агульную аснову. Беларускі саюз выйшаў з савецкага камсамола і ўвабраў у сябе лепшы досвед і традыцыі, а Камуністычны саюз моладзі Хашыміна быў заснаваны, фарміраваўся пад кіраўніцтвам Камуністычнай партыі В'етнама і Прэзідэнта Хо Шы Міна. «Гэты факт даказвае, што абодва саюзы размаўляюць адной мовай і жывуць аднымі і тымі ж ідэаламі» – заключыў ён.

Паводле яго слоў, Беларускі рэспубліканскі саюз моладзі і Камуністычны саюз моладзі Хашыміна маюць бязмежны патэнцыял для ўзаемадзеяння.

Актыўны ўдзел БРСМ у фарміраванні ключавых напрамкаў дзяржаўнай палітыкі Беларусі з'яўляецца агульнавядомым фактам. Гэта пацвярджаецца ўдзелам 80 прадстаўнікоў арганізацыі ва Усебеларускім народным сходзе – галоўным канстытуцыйным органе народнага прадстаўніцтва ў краіне, які пачне работу ў новай якасці 24-25 красавіка. Таксама шырока вядомы і статус Камуністычнага саюза моладзі Хашыміна як арганізацыі, якая адыгрывае ключавую ролю ва ўмацаванні ідэалагічнай базы Камуністычнай партыі В'етнама. Сукупнасць гэтых фактараў, паводле слоў спадара Варанкова, стварае бязмежныя магчымасці для ўзаемадзеяння паміж БРСМ і Камуністычным саюзам моладзі Хашыміна.

«Дзякуючы абменам візітамі, мы больш разумеем адзін аднаго і наладжваем трывалыя сувязі» – пракаментаваў Генеральны консул Беларусі.

Пагадненне паміж Хашымінам і Мінскам
Хашымін і Мінск падпісалі пагадненне аб супрацоўніцтве ў 2008 годзе. Генеральны консул Варанкоў паведаміў, што з таго часу паміж двума гарадамі было арганізавана мноства мерапрыемстваў.

«Адным з іх з'яўляецца вызначэнне на аснове агульнага дакумента пераліку мерапрыемстваў, якія ўяўляюць агульную цікавасць для двух гарадоў. Гэта пагадненне з'яўляецца асноватворным дакументам для таго, каб Мінск і Хашымін выбудоўвалі праграмы супрацоўніцтва, па сутнасці, дарожныя карты» – сказаў ён.

За перыяд дзеяння пагаднення на аснове гэтых праграм супрацоўніцтва было праведзена шмат мерапрыемстваў. На рэалізацыю пагаднення паўплывала пандэмія Covid-19, але спадар Варанкоў адзначыў, што абодва бакі поўныя рашучасці нагнаць упушчанае. «Цяпер мы скончваем работу па ўзгадненню аналагічнага дакумента на перыяд 2024-2026 гадоў, які, як чакаецца, будзе ўключаць у сябе мноства эканамічных, гандлёвых і гуманітарных мерапрыемстваў» – сказаў ён.

Генеральны консул Беларусі падкрэсліў, што паміж двума гарадамі рэгулярна падтрымліваюцца кантакты і праходзяць шматлікія візіты на ўзроўні кіраўніцтва.

Патэнцыял супрацоўніцтва
Паводле слоў Генеральнага консула Варанкова, для Беларусі прыярытэтам двухбаковага супрацоўніцтва з В'етнамам з'яўляецца развіццё гандлёвых адносін. У 2023 годзе тавараабарот паміж Беларуссю і В'етнамам дасягнуў рэкорднага ўзроўню і склаў каля 250 млн. долараў ЗША, што на 35% больш, чым у 2022 годзе. Экспарт Беларусі дасягнуў каля 85 млн долараў ЗША, а імпарт - каля 163 млн долараў ЗША.

«Як бачна, экспарт В'етнама амаль у два разы перавышае экспарт Беларусі. У мэтах збалансаванага тавараабароту з усімі краінамі Беларусь імкнецца павялічыць пастаўкі прадукцыі ў В'етнам. Пасля паспяховай сертыфікацыі малочнай прадукцыі ў 2020 годзе мы нацэлены завяршыць сертыфікацыю беларускага мяса ў В'етнаме» – падзяліўся ён.

Для развіцця турыстычнага сектара авіяцыйныя ўлады абедзвюх краін пачалі перагаворны працэс аб адкрыцці прамых рэйсаў. Генеральны консул Варанкоў адзначыў, што В'етнам мае патэнцыял для ўдзелу беларускіх кампаній у інфраструктурных праектах, такіх як прадастаўленне дарожнай, гарадской і пасажырскай тэхнікі, экалагічна чыстага гарадскога транспарту для патрэб горада і перадачы адпаведнага досведу.

«Нам неабходна стварыць больш гісторый поспеху, каб прыцягнуць больш беларускіх прадпрыемстваў да інвестыцый у В'етнам у цэлым, і ў прыватнасці ў Хашымін» – заклікаў ён.

Дыпламат прывёў у прыклад прадпрыемства ў правінцыі Хынг’ен, якое займаецца зборкай беларускіх грузавікоў, і бачыць аналагічны патэнцыял для беларускіх трактароў. Калі неабходны ўзровень лакалізацыі будзе дасягнуты, гэта адкрые рынак АСЕАН.

«Мы таксама прыкладаем намаганні каб вярнуць легендарны мінскі матацыкл на в'етнамскі рынак. Ёсць шмат іншых недаследаваных абласцей, дзе мы можам працаваць разам для ўзаемнай выгады, і наша мэта – выявіць і вывучыць іх» – заявіў спадар Варанкоў.

Падабенствы
Напярэдадні 49-годдзя Вызвалення Поўдня, уз'яднання краіны і напярэдадні
79-годдзя Дня Незалежнасці, Генеральны консул Варанкоў расказаў, што гістарычна беларускі народ таксама адзначае дні аб'яднання і вызвалення.

Паводле яго слоў, Дзень Незалежнасці Беларусі (3 ліпеня) прысвечаны вызваленню сталіцы Мінска ад нацысцкай Германіі. У гэтым годзе Беларусь адзначае 80-годдзе сваёй Незалежнасці, і ён назваў гэта самай важнай падзеяй у гісторыі Беларусі. Наступны па важнасці - Дзень народнага адзінства (17 верасня). Гэта дата, якая адзначаецца ў памяць аб уз'яднанні заходняй і ўсходняй частак Беларусі ў 1939 годзе пасля 18 гадоў прымусовага падзелу, які адбыўся насуперак волі беларускага народа.

«У В'етнаме я заўсёды сутыкаюся з падобнымі падзеямі ў гісторыі дзвюх краін. На мой погляд, такое падабенства дапамагае нашым людзям лепш разумець адзін аднаго і падсвядома збліжацца» – падзяліўся ён.

«З нагоды Дня аб'яднання ў В'етнаме хацеў бы пажадаць в'етнамскаму народу: міру, росквіту, моцнага здароўя, а ўсёй краіне – паспяховага выканання ўсіх задач, пастаўленых кіраўніцтвам Партыі» – пажадаў спадар Варанкоў.

Многія напрамкі дзейнасці Генеральнага консульства Беларусі
Генеральны консул Беларусі ў Хашыміне Руслан Варанкоў распавёў газеце «Thanh Nien», што, нягледзячы на тое, што Генеральнае консульства Беларусі было створана не так даўно, яно правяло мноства мерапрыемстваў, дзе Генеральны консул браў актыўны ўдзел разам са службовымі асобамі і супрацоўнікамі Генеральнага консульства для іх паспяховай рэалізацыі.

Пасля адкрыцця ў снежні 2023 года Генеральнае консульства пашырыла сваю консульскую акругу, уключыўшы ў яе яшчэ 17 правінцый і гарадоў і пашырыўшы дыпламатычную прысутнасць. Генеральнае консульства аказала садзейнічанне ў арганізацыі двух візітаў першага намесніка Старшыні Мінскага гарадскога выканаўчага камітэта спадарыні Надзеі Лазарэвіч у Хашымін, прасоўваючы дыялог на ўзроўні гарадоў.

Генеральнае консульства таксама прадставіла на выставе «Vietnam Expo 2023» вялікую бізнес-дэлегацыю з Беларусі, якая ўключае больш за 36 арганізацый. Адначасова быў арганізаваны Беларуска-В'етнамскі бізнес-форум, які стаў асновай для заключэння двухбаковых гандлёвых пагадненняў.

Праведзеныя Дні беларускай культуры ў Хашыміне і Барыя-Вунгтаў з мэтай пазнаёміць В'етнам з беларускай культурай. «Гэтыя ініцыятывы адлюстроўваюць двухбаковыя адносіны ў шматлікіх галінах. І Генеральнае консульства, і я прысвяцілі сябе паспяховай рэалізацыі гэтых важных мерапрыемстваў» – распавёў спадар Варанкоў.