Аб удзеле Міністра замежных спраў Беларусі М.Рыжанкова ў тыдні высокага ўзроўню 79-ай сесіі Генеральнай Асамблеі ААН (трэці дзень)

29 верасня 2024 г.

28 верасня 2024 г. Міністр замежных спраў Максім Рыжанкоў выступіў ад Рэспублікі Беларусь на агульнапалітычнай дыскусіі 79-й сесіі Генеральнай Асамблеі ААН.

Кіраўнік знешнепалітычнага ведамства адкрыта назваў асноўныя прычыны эрозіі глабальнай сістэмы бяспекі і паслаблення ролі ААН ва ўрэгуляванні самых вострых канфліктаў і праблем чалавецтва. У сувязі з гэтым прыцягнуў увагу да ініцыятывы кіраўніка беларускай дзяржавы аб надзённай патрэбнасці пачаць глабальны дыялог па бяспецы.

Міністр падкрэсліў, што ААН павінна вызваліцца ад дыктату з боку асобных дзяржаў, якія пакутуюць усёдазволенасцю і ўласнай выключнасцю. Адзначыў, што Беларусь і далей будзе настойваць на справядлівай рэформе Савета Бяспекі і ўключэнні ў склад яго пастаянных членаў буйных краін, якія развіваюцца Азіі, Афрыкі і Лацінскай Амерыкі.

Кіраўнік беларускай дэлегацыі заклікаў ААН больш актыўна падтрымліваць рэгіянальныя працэсы і ўзаемадзейнічаць з рэгіянальнымі арганізацыямі, паколькі рэгіяналізм – гэта ключавая рэалія сённяшняга дня.

Асобна адзначыў вострую неабходнасць сур'ёзных і аб'ектыўных ацэнак Арганізацыі ў дачыненні да разбуральнага ўплыву незаконных санкцый на працэсы ўстойлівага развіцця, а таксама перавод гэтай работы на сістэмную аснову.

Міністра замежных спраў Беларусі прыняў Генеральны сакратар Арганізацыі Антоніу Гутэрыш. Закрануты пытанні актуальнага міжнароднага парадку дня, у іх ліку Глабальная і рэгіянальная бяспека. Максім Рыжанкоў адзначыў неабходнасць павышэння ролі ААН у супрацьдзеянні незаконным аднабаковым прымусовым мерам. Генеральны сакратар асобна падкрэсліў актыўную і прыкметную ролю Беларусі ў ААН і перадаў самыя цёплыя пажаданні Кіраўніку беларускай дзяржавы.

На палях сесіі Генасамблеі таксама прайшлі перамовы Максіма Рыжанкова з Міністрам замежных спраў Ірана Абасам Аракчы. Разгледжана дарожная карта двухбаковага супрацоўніцтва і пытанні актывізацыі ўзаемадзеяння паміж МЗС дзвюх краін. Дасягнуты дамоўленасці аб серыі бліжэйшых галіновых кантактаў у Мінску і Тэгеране. Іран пацвердзіў падтрымку Беларусі на шляху да партнёрскага статусу краіны ў БРІКС.

На парадку дня дзвюх краін таксама арганізацыя шэрагу сустрэч на вышэйшым і высокім узроўні.

Змястоўныя перамовы прайшлі з Міністрам замежных спраў Азербайджана Джэйхунам Байрамавым. Бакі канстатавалі стратэгічны характар адносін. Абмеркавалі ход рэалізацыі дамоўленасцей кіраўнікоў дзяржаў, дасягнутых падчас дзяржаўнага візіту Прэзідэнта Беларусі ў Азербайджан у маі 2024 г., дасягнулі дамоўленасцей па спосабах актывізацыі і сістэматызацыі работы па шэрагу напрамкаў.

Падрабязна спыніліся на парадку дня маючых адбыцца ў бліжэйшы час візітаў на высокім узроўні, узаемадзеянні па лініі МЗС дзвюх краін, сумесных кааперацыйных і інфраструктурных праектах.