Аб выступленні кіраўніка дэлегацыі, Пастаяннага прадстаўніка Беларусі пры міжнародных арганізацыях у Вене А.Дапкюнаса на сесіі Генеральнай канферэнцыі МАГАТЭ

18 верасня 2024 г. на 68-й сесіі Генеральнай канферэнцыі Міжнароднага агенцтва па атамнай энергіі (МАГАТЭ) кіраўнік беларускай дэлегацыі, Пастаянны прадстаўнік Беларусі пры міжнародных арганізацыях у Вене Андрэй Дапкюнас выступіў падчас агульнай дыскусіі генканферэнцыі.

У выступленні А.Дапкюнас падкрэсліў важнасць захавання за агенцтвам ролі галоўнага міжнароднага механізму для садзейнічання краінам у атрыманні доступу да выгод мірнага атама, а таксама забеспячэння фізічнай ядзернай бяспекі. Беларускі дыпламат падкрэсліў, што, выконваючы гэтыя функцыі, МАГАТЭ павінна строга кіравацца сваім мандатам.

Кіраўнік беларускай дэлегацыі сказаў аб глыбокай занепакоенасці Беларусі ў сувязі з паведамленнямі аб магчымых атаках і правакацыях у адносінах да шэрагу ядзерных аб'ектаў, Запарожскай і Курскай АЭС. Асудзіўшы атакі на энергетычную інфраструктуру і АЭС, беларускі дыпламат заклікаў кіраўніцтва агенцтва неадкладна і самым рашучым чынам рэагаваць на сітуацыі, якія ствараюць пагрозу ядзернай бяспецы на АЭС.

А.Дапкюнас паведаміў аб прагрэсе ў рэалізацыі нацыянальнай праграмы ядзернай энергетыкі, акцэнтуючы ўвагу на прыярытэтнасці для Беларусі пытанняў ядзернай і радыяцыйнай бяспекі. Беларускі дыпламат адзначыў, што Беларусь поўнасцю адкрыта да канструктыўнага экспертнага дыялога з усімі зацікаўленымі бакамі і абмену вопытам.

Пастаянны прадстаўнік таксама адзначыў, што справаздачы аб ацэначных і кансультатыўных місіях МАГАТЭ ў Беларусі размешчаны ў адкрытым доступе. Усе праведзеныя місіі былі вельмі карыснымі для краіны. Вынікі іх працы – рэкамендацыі і прапановы – пакладзены ў аснову нацыянальных планаў дзеянняў.

Кіраўнік беларускай дэлегацыі вітаў правядзенне навуковага форуму генеральнай канферэнцыі па флагманскай ініцыятыве "Атам для харчавання", адзначыўшы важнасць выкарыстання ядзерных тэхналогій у сельскагаспадарчай вытворчасці для забеспячэння харчовай бяспекі. У гэтым кантэксце была звернута ўвага на негатыўны ўплыў санкцый, у тым ліку забарона заходнімі краінамі транзіту беларускіх калійных угнаенняў, на глабальную харчовую бяспеку. А.Дапкюнас заклікаў адмовіцца ад згубнай практыкі прымянення супрацьпраўных аднабаковых прымусовых мер.

версія для друку