Аб удзеле намесніка Міністра замежных спраў Беларусі А.Дапкюнаса ў тэматычным мерапрыемстве па правах дзяцей

27-02-2019

26 лютага 2019 г. у рамках візіту ў Жэневу намеснік Міністра замежных спраў Рэспублікі Беларусь Андрэй Дапкюнас узяў удзел у тэматычным мерапрыемстве “Правы дзяцей з пункту гледжання Мэт устойлівага развіцця: дружалюбныя і разумныя ўстойлівыя гарады як неабходная ўмова для забеспячэння эфектыўнага ажыццяўлення правоў дзяцей”, якое было арганізавана ў Аддзяленні ААН у Жэневе па ініцыятыве Беларусі сумесна з Дзіцячым фондам ААН (ЮНІСЕФ), Еўрапейскай Эканамічнай Камісіяй ААН (ЕЭК ААН) і Міжнародным саюзам электрасувязі (МСЭ).

Такое мерапрыемства па ўліку правоў дзяцей у кантэксце сучаснага гарадскога развіцця з удзелам вядучых агенцтваў ААН праводзіцца ў Жэневе ўпершыню. Беларусь выступіла ініцыятарам правядзення гэтага мерапрыемства, зыходзячы са свайго нацыянальнага вопыту па развіцці сеткі гарадоў, дружалюбных дзецям і падлеткам, якая ўжо налічвае 25, уключаючы Мінск.

Удзельнікі мерапрыемства прыйшлі да адзінага меркавання аб прамой сувязі паміж вынікамі развіцця дзяржаў і, у прыватнасці, развіцця гарадской інфраструктуры, і здольнасцю дзяржаў забяспечваць адэкватны адказ на патрэбы развіцця дзяцей і ў канчатковым выніку – належны ўзровень выканання іх правоў.

Была падкрэслена мэтазгоднасць скразнога ўліку дзіцячага фактару пры праграмным планаванні мер нацыянальных урадаў і мясцовых уладаў па дасягненні Мэт устойлівага развіцця.

Удзельнікі дыскусіі паказалі на існаванне шырокага патэнцыялу для паляпшэння ўзаемадзеяння паміж урадамі, мясцовымі гарадскімі ўладамі, агенцтвамі ААН, няўрадавым і прыватным сектарам у мэтах садзейнічання развіццю на краінавым узроўні і забеспячэння інтарэсаў кожнага чалавека і дзіцяці.

Вынікі мерапрыемства, таксама як і нацыянальны вопыт Беларусі ў гэтай сферы, будуць прадстаўлены ў красавіку 2019 года на форуме мэраў на палях сесіі Еўрапейскай эканамічнай камісіі ААН, а таксама пазней у Кёльне на глабальным форуме гарадоў, дружалюбных дзецям. Плануецца, што вынікі работы па гэтым пытанні на міжнародных пляцоўках будуць карысныя як крыніцы перадавога вопыту для зацікаўленых дзяржаў і агенцтваў сістэмы ААН.

Да ўдзельнікаў мерапрыемства таксама звярнуліся Рэгіянальны дырэктар ЮНІСЕФ Афшан Хан, Выканаўчы сакратар ЕЭК ААН Вольга Алгаерава, дырэктар бюро стандартызацыі электрасувязі МСЭ Чаэсуб Лі. У якасці дакладчыкаў у мерапрыемстве ўзялі ўдзел эксперты названых агенцтваў, моладзь Беларусі, а таксама шэраг аўтарытэтных міжнародных няўрадавых арганізацый.

Для даведкі: канцэпцыя гарадоў, дружалюбных дзецям і падлеткам, уяўляе сабой праграму, якая заклікае дапамагчы гораду стаць больш добразычлівым да дзяцей ва ўсіх аспектах, якія тычацца кіравання, інфраструктуры і паслуг. Ключавым элементам такіх гарадоў з'яўляецца абавязковы ўдзел дзяцей і моладзі ў працэсах прыняцця рашэнняў, якія закранаюць іх інтарэсы.

русская версия   English version

версія для друку