Аб удзеле дэлегацыі Беларусі ў 39-й сесіі Савета ААН па правах чалавека

12-09-2018

10 – 28 верасня 2018 г. дэлегацыя Беларусі на чале з Пастаянным прадстаўніком Рэспублікі Беларусь пры Аддзяленні ААН і іншых міжнародных арганізацыях у Жэневе Юрыем Амбразевічам прымае ўдзел у якасці назіральніка ў працы 39-й сесіі Савета ААН па правах чалавека.

Кіраўнік беларускай дэлегацыі выступіў падчас інтэрактыўнай дыскусіі з новым Вярхоўным камісарам ААН па правах чалавека Мішэль Бачэлет.

Ю.Амбразевіч пажадаў М.Бачэлет на новай пасадзе захоўваць аб’ектыўнасць і невыбіральнасць, а таксама прыхільнасць такім прынцыпам пры разглядзе пытанняў правоў чалавека, як кансэнсус, супрацоўніцтва і дыялог.

Прадстаўнік акцэнтаваў увагу на неабходнасці большага развіцця ў Савеце па правах чалавека і ў цэлым у міжнароднай праваабарончай сістэме механізмаў супрацоўніцтва і дыялогу па аналогіі з універсальным перыядычным аглядам.

Беларусь заклікала Упраўленне Вярхоўнага камісара па правах чалавека больш выкарыстоўваць у працы з дзяржавамі патэнцыял экспертнай дапамогі, найлепшых практык і тэхнічнага супрацоўніцтва.

версія для друку