Аб удзеле намесніка Міністра замежных спраў Беларусі А.Краўчанкі ў канферэнцыі ў г.Рыме

29-01-2018

29 студзеня 2018 г. у г.Рыме намеснік Міністра замежных спраў Рэспублікі Беларусь Алег Краўчанка прыняў удзел у Міжнароднай канферэнцыі АБСЕ па пытаннях адказнасці дзяржаў, інстытутаў і грамадзян у барацьбе супраць антысемітызму і злачынстваў на глебе нянавісці, звязанай з антысемітызмам.

У сваім выступленні на пленарным пасяджэнні канферэнцыі А.Краўчанка пацвердзіў прынцыповую і паслядоўную пазіцыю Беларусі ў сферы барацьбы з антысемітызмам у кантэксце глабальных намаганняў міжнароднай супольнасці па барацьбе з расізмам, ксенафобіяй, нецярпімасцю і дыскрымінацыяй ва ўсіх формах і праявах.

Удзельнікі канферэнцыі былі азнаёмлены з інфармацыяй аб трагедыі Халакоста ў Беларусі. Намеснік Міністра звярнуў увагу прысутных на даўнюю традыцыю мірнага сумеснага жыцця прадстаўнікоў розных нацыянальнасцей і рэлігійных канфесій на беларускай зямлі, адсутнасць у нашай краіне якіх бы там ні было канфліктаў на нацыянальнай, рэлігійнай, культурнай глебе.

У мерапрыемстве таксама прынялі ўдзел Дзеючы старшыня АБСЕ, Міністр замежных спраў Італіі Анджэліна Альфана, Генеральны сакратар АБСЕ Томас Грэмінгер, прадстаўнікі органаў дзяржаўнага кіравання з 20 краін, няўрадавых арганізацый, нацыянальных і рэлігійных абшчын.

На палях канферэнцыі адбыліся сустрэчы А.Краўчанкі з Міністрам замежных спраў і міжнароднага супрацоўніцтва Італіі Анджэліна Альфана, дыпламатычным саветнікам Прэзідэнта Італіі Эмануэлай Д'Алесандра, а таксама кіраўнікамі шэрага дэлегацый краін-удзельніц АБСЕ. Абмеркаваны пытанні двухбаковага парадку дня, узаемадзеянне па лініі Беларусь — ЕС, супрацоўніцтва на міжнароднай арэне.

У рамках мерапрыемства кіраўнікі дэлегацый былі прыняты Папам Рымскім Францішкам.

русская версия      English version

версія для друку