Аб удзеле Міністра замежных спраў Беларусі У.Макея ў фестывалі “У Беларусі як дома. 2.0.”

05 ліпеня 2019 г.

05-07-2019

5 ліпеня 2019 г. па запрашэнні Міністэрства замежных спраў кіраўнікі і супрацоўнікі дыпламатычных місій, акрэдытаваных у нашай краіне, разам са сваімі сем'ямі прынялі ўдзел у стаўшым ужо традыцыйным фестывалі “У Беларусі як дома”.

Мерапрыемства, якое ладзіцца ў трэці раз, з аднаго боку, прысвечана беларускаму святу “Дзень вышыванкі”, а з другога – з’яўляецца сімвалам павагі, з якой у нашай краіне ставяцца да ўсіх без выключэння культур і нацыянальнасцей. Атмасфера яднання, якая пануе на гэтых сустрэчах, дазваляе бліжэй пазнаёміцца з нацыянальным каларытам, кухняй і традыцыямі народаў, краін, рэгіёнаў і нават кантынентаў.

У сваім выступленні У.Макей з задавальненнем адзначыў, што свята “У Беларусі як дома” пераўтвараецца ў сапраўдны, унiкальны і па-хатняму ўтульны фестываль культур. Міністр падкрэсліў актуальнасць і важнасць правядзення такіх мерапрыемстваў, як асновы для збліжэння, лепшага разумення і давера паміж прадстаўнікамі розных краін.

“Мы ў Беларусi шчыра ўпэўнены, што залог прагрэсу i росквiту – у шматпалярнасцi i разнастайнасцi свету, мажлiвасцi ўшаноўваць i з гонарам услаўляць як традыцыi продкаў, так i здабыткi сучаснiкаў”, – адзначыў У.Макей.

На фестывалі прадстаўлены нацыянальныя кухні каля 20 краін свету, сярод якіх Індыя, Італія, Карэя, Пакістан, ААЭ, Польшча, Судан, Таджыкістан, Чэхія, Украіна.

Фестываль дазволіў пазнаёміцца з унікальнымі танцамі і песнямі народаў Азербайджана, Індыі, Ірана, Казахстана, Карэі, Расіі, Туркменістана, Турцыі, Украіны і фотавыставай, прысвечанай краявідам розных краін “Мой родны кут”.