Аб удзеле Міністра замежных спраў Беларусі Уладзіміра Макея ў агульнай дыскусіі Генеральнай Асамблеі ААН

29 сентября 2013 г.

29-09-2013

28 верасня 2013 г. падчас знаходжання ў Нью-Ёрку Міністр замежных спраў Рэспублiкi Беларусь Уладзімір Макей прыняў удзел у агульнай дыскусіі Генеральнай Асамблеі ААН.

У сваiм выступленнi Міністр звярнуў увагу на шпаркі тэмп глабалізацыі, за якім сучаснае чалавецтва не паспявае ў сваім развіцці. Такая сітуацыя параджае шэраг праблем палітычнага, эканамічнага і сацыяльнага кшталту. Дзеля пераадолення гэтых праблем, на думку У.Макея, неабходна стварыць новыя механізмы, якія маглі б увасобіць сабой новы глабальны парадак. Калі такі парадак не будзе створаны, чалавецтва зможа сутыкнуцца з адсутнасцю глабальнага кіравання і міравой анархіяй.

Глава беларускай дэлегацыі прапанаваў у якасці аднаго з элементаў такога глабальнага парадку разглядаць умацаванне ролі дзяржавы. Толькі моцная дзяржава здолее вырашыць праблемы “забытага чалавека”. Міністр звярнуў увагу на недапушчальнасць прымянення санкцый у адносінах да такіх краінаў, як Беларусь альбо Куба, народы якіх імкнуцца пабудаваць моцную дзяржаву.

У.Макей выказаў думку аб неабходнасці распрацоўкі парадку дня ў галіне развіцця на перыяд пасля 2015 года на аснове мэтаў устойлівага развіцця, перш за ўсё такіх, як міграцыя, энергетыка, занятасць. Рэалізацыя гэтых мэтаў, на думку Міністра, павінна ажыццяўляцца на аснове глабальных партнёрстваў, адным з паспяховых прыкладаў якіх з’яўляецца ініцыяванае Беларуссю Глабальнае партнёрства супраць рабства і гандлю людзьмі.

Глава беларускай дэлегацыі заклікаў міжнароднае супольніцтва ў сённяшніх складаных умовах пазбавіцца логікі ўчарашняга дня і сумесна дзейнічаць на карысць усіх людзей на планеце.

У гэты ж дзень У.Макей правёў сустрэчу з Міністрам замежных спраў Лаоса Тханглунам Сiсулiтам для абмеркавання стану і перспектыў супрацоўніцтва паміж Беларуссю і Лаосам.