У Беластоку 9 чэрвеня 2002 года, у гарадскім амфітэатры прайшло Свята беларускай культуры, арганізатарам якога традыцыйна выступае Галоўнае праўленне Беларускага грамадска-культурнага таварыства ў Польшчы (БГКТ).
Ад Рэспублікі Беларусь на Свяце прысутнічалі Надзвычайны і Паўнамоцны Пасол Беларусі ў Польшчы Мікалай Крэчка, Генеральны консул Беларусі ў Беластоку Леанід Каравайка, прадстаўнікі Міністэрства замежных спраў Беларусі, а таксама намеснік начальніка упраўлення міжнародных сувязей Міністэрства адукацыі Беларусі Генадзь Пяцігор. З польскага боку на Свяце беларускай культуры прысутнічалі высокія госці: Падляскі ваявода Марэк Стшаліньскі, сенатар Сергіуш Плева, віцэ-прэзідэнт г.Беластока Марэк Казлоўскі, кіраўніцтва Падляскага СЛД, саветнік міністра замежных спраў Польшчы Анатоль Вакулюк, прадстаўнікі органаў мясцоваго самакіравання Беласточчыны.
Святочны канцэрт, ў якім удзельнічала каля 30 мастацкіх калектываў з усяго Падлясся, сабраў каля пяці тысяч гледачоў - аматараў беларускай песні. У канцэрце таксама прымалі ўдзел беларускія эстрадныя салісты - заслужаны артыст Беларусі Якаў Навуменка і Сяргей Восіпаў, а таксама фальклорны калектыў "Зараніца" з Нясвіжа. Ад імя Міністэрства замежных спраў Беларусі і Пасольства Беларусі ў Польшчы беластоцкаму эстраднаму калектыву "Прымакі" былі падараваны новыя сцэнічныя касцюмы, а Міністэрства адукацыі Рэспублікі Беларусь падаравала БГКТ беларускія падручнікі, метадычныя выданні, а таксама буквары для школ Падлясся, у якіх вывучаецца беларуская мова.
На тэрыторыі, прылеглай да амфітэатра, быў арганізаваны кірмаш, дзе можна было набыць беларускія кніжкі, вырабы з саломкі, творы народных умельцаў з Беларусі і Падлясся, аўдыё- касеты і кампакт-дыскі з запісамі беларускіх калектываў і салістаў.