Адказ прэс-сакратара МЗС Беларусі Р.Варанкова на пытанне інфармацыйнага агенцтва «РІА Навіны»

«РІА Навіны»: У выданні Le Monde з'явілася інфармацыя пра тое, што на мінулым тыдні Мінск наведаў высокапастаўлены супрацоўнік МЗС Францыі. Ці можаце вы гэта пацвердзіць і пракаментаваць?

Р.Варанкоў: Хацеў бы звярнуць увагу, што такія візіты не з'яўляюцца чымсьці надзвычайным. 

Беларускі бок падтрымлівае рэгулярныя працоўныя кантакты як з Францыяй, так і з іншымі заходнімі дзяржавамі. 

Пры гэтым дыялог як па двухбаковых каналах, так і на палях шматбаковых мерапрыемстваў нярэдка мае канфідэнцыяльны характар.
 
Але паколькі гэтая інфармацыя была апублікаваная, мы пацвярджаем, што 5 і 6 лютага ў Мінску на запрашэнне беларускага боку знаходзіўся дырэктар дэпартамента кантынентальнай Еўропы галоўнага дэпартамента па палітычных пытаннях і пытаннях бяспекі Міністэрства замежных спраў Французскай Рэспублікі Брыс Ракфёй.

Адбылася яго сустрэча з намеснікам Міністра замежных спраў Беларусі Ігарам Сякрэтай. 

Акрамя таго, французскі дыпламат правёў кансультацыі з прадстаўнікамі беларускай экспертна-аналітычнай супольнасці.

Мы заўсёды адкрытыя да раўнапраўнага дыялогу, калі ён будуецца на прынцыпах узаемнай павагі і накіраваны на пошук рашэнняў, якія маюць узаемны інтарэс.