Выступ намесніка Пастаяннага прадстаўніка Беларусі пры ААН А.Панфёрава на пасяджэнні Савета Бяспекі ААН у рамках адкрытай дыскусіі на тэму «Адстойванне мэтаў і прынцыпаў Статута ААН і ўмацаванне міжнароднай сістэмы, у якой цэнтральнае месца займае ААН» (28 мая 2026 г., г.Нью-Ёрк)

Шаноўны спадар Старшыня,

Дзякуем Кітайскай Народнай Рэспубліцы за арганізацыю пасяджэння высокага ўзроўню Савета Бяспекі ААН і цёпла вітаем у Нью-Ёрку Яго Экселенцыю спадара Ван І, Міністра замежных спраў Кітая.

Беларусь цалкам падтрымлівае мэты гэтай сустрэчы і падзяляе пазіцыю, выкладзеную раней Кітайскай Народнай Рэспублікай.

Сёння шматбаковая сістэма праходзіць беспрэцэдэнтнае выпрабаванне на трываласць.

Трагічна, што штодзённыя навіны аб чарговых усплёсках кровапралітных супрацьстаянняў – кажам мы пра Блізкі Усход, Афрыку ці Еўропу – сталі хутчэй звыклай звычайнасцю, чым рэдкім выключэннем.

Прынцыпы шматбаковасці ў міжнародных адносінах цалкам ігнаруюцца. Узброеныя канфлікты, палітычная барацьба паміж наймацнейшымі дзяржавамі свету, інфармацыйныя войны, нічым не прыкрытае «цкаванне» непажаданых краін – яскравы доказ гэтаму.

Дэградуюць асноўныя шматбаковыя дакументы ў сферы падтрымання міжнароднага міру і бяспекі. Разбурэнню падвяргаюцца рэжымы ў галіне раззбраення і нераспаўсюджвання. Усё гэта падводзіць мір да рысы, за якой выразна бачная ядзерная пагроза.

Некалькі дзён таму мы сталі сведкамі правалу спроб прыняць у ААН выніковы дакумент 11-й Канферэнцыі па разглядзе дзеяння Дагавора аб нераспаўсюджанні ядзернай зброі.

У бягучых ваенна-палітычных умовах дасягненне ключавой мэты ДНЯЗ – усеагульнага і поўнага раззбраення – гэта цяжкавыканальная, а дакладней, абсалютна нерэалістычная задача.

Аднак мы перакананы, што неабходна настойліва працягваць паэтапны, паслядоўны дыялог пры ўмове захавання ўсімі дзяржавамі ключавых прынцыпаў: узаемнай павагі і ўліку інтарэсаў усіх бакоў, адмовы ад прымянення або пагрозы прымянення сілы, а таксама забеспячэння роўнай і непадзельнай бяспекі.

У гэтых намаганнях асаблівую ролю адыгрывае няўхільнае прытрымліванне мэт і прынцыпаў Статута ААН і захаванне міжнароднага права, а не "парадку, заснаванага на правілах".

Беларусь з'яўляецца ўдзельнікам Групы сяброў у абарону Статута ААН і цалкам падтрымлівае яе дзейнасць. Вітаем заснаванне па ініцыятыве гэтай Групы Міжнароднага дня барацьбы з аднабаковымі прымусовымі мерамі і правядзенне ў мінулым годзе адпаведнага ўрачыстага пасяджэння Генасамблеі ААН.

Працягваем падтрымліваць міжнародныя намаганні, накіраваныя на выкараненне аднабаковасці і прымусовых мер як інструментаў міжнародных адносін, якія аказваюць бясспрэчнае адмоўнае ўздзеянне на ўсю сістэму міжнародных адносін, падрываюць стабільнасць і ўстойлівае развіццё. Цвёрда прытрымліваемся прынцыпаў роўнасці дзяржаў, неўмяшання ва ўнутраныя справы і вырашэння спрэчак мірнымі сродкамі.

Санкцыі ў абыход Статута ААН павінны быць выкаранены як з'ява!

Мы выказваем салідарнасць з усімі краінамі, якія сталіся ахвярамі такой палітыкі. Асабліва падкрэслім неабходнасць неадкладнага зняцця ўсіх абмежавальных мер і адмены эканамічнай і фінансавай блакады Кубы.

Спадар Старшыня,

Беларусь робіць свой унёсак ва ўмацаванне міру, устойлівага развіцця і міжнароднага супрацоўніцтва не на словах, а на справе, актыўна прасоўваючы ідэю аб узнаўленні шырокага міжнароднага дыялогу па аднаўленні мер даверу, бяспекі і супрацоўніцтва на еўразійскай прасторы на аснове прынцыпаў шматпалярнасці і шматбаковасці.

Вынікам гэтых намаганняў стала сумесная беларуска-расійская ініцыятыва аб прыняцці з удзелам шырокага кола краін Еўразіі асноватворнага магістральнага дакумента – Еўразійскай хартыі разнастайнасці і шматпалярнасці ў XXI стагоддзі.

Запрашаем партнёраў далучыцца да гэтай ініцыятывы і падтрымаць Хартыю!

Беларусь выступае супраць палітыкі сілы і дамінавання. Мы адмаўляем спробы перапісаць міжнародныя правілы ў аднабаковым парадку – у інтарэсах толькі абраных дзяржаў. Гэта прамая пагроза шматбаковай сістэме, якую ААН абавязана бараніць.

Беларусь застаецца адкрытай для ўзаемавыгаднага і паважлівага супрацоўніцтва з усімі без выключэння дзяржавамі.

Дзякую за ўвагу.