Аб удзеле Міністра замежных спраў Беларусі М.Рыжанкова ў Мадэлі ААН, прымеркаванай да Міжнароднага дня дэлегата, на ФМА БДУ

24 красавіка 2026 г. Міністр замежных спраў Рэспублікі Беларусь Максім Рыжанкоў выступіў перад студэнтамі – удзельнікамі Мадэлі ААН, якая штогод праводзіцца на факультэце міжнародных адносін Беларускага дзяржаўнага ўніверсітэта і прысвечана Міжнароднаму дню дэлегата.

Для даведкі: Міжнародны дзень дэлегата быў абвешчаны рэзалюцыяй Генеральнай Асамблеі ААН 73/286 з ініцыятывы Беларусі і адзначаецца штогод 25 красавіка (у першы дзень Міжнароднай канферэнцыі ў Сан-Францыска 1945 года, вынікам якой стала стварэнне Арганізацыі Аб'яднаных Нацый).

Кіраўнік беларускага знешнепалітычнага ведамства падкрэсліў, што, ініцыюючы абвяшчэнне Міжнароднага дня дэлегата ў 2019 годзе, нашая краіна імкнулася аддаць даніну павагі і памяці дэлегатам, у якіх у 1945 годзе на канферэнцыі ў Сан-Францыска атрымалася стварыць устойлівую сістэму міжнароднага супрацоўніцтва. Міністр нагадаў, што сярод дэлегатаў Сан-Францыскай канферэнцыі былі і беларусы, і іх унёсак у фарміраванне архітэктуры пасляваеннай светабудовы – падстава для асаблівага гонару. 

Максім Рыжанкоў акцэнтаваў, што сённяшні свет перажывае адзін з найбольш складаных перыядаў за апошнія дзесяцігоддзі, а падзеі, якія адбываюцца ў глабальнай палітыцы, ставяць пад сумнеў дзейснасць міжнароднага права і эфектыўнасць ААН. Пры гэтым Міністр асабліва адзначыў, што Беларусь, як краіна – заснавальніца ААН, выступае за захаванне таго, што было створана папярэднімі пакаленнямі, паколькі альтэрнатывы і аналагаў Арганізацыі ў сучасным свеце няма.

У гэтай сувязі Міністр выказаў падтрымку традыцыі правядзення Мадэлі ААН і заклікаў будучых міжнароднікаў захоўваць веру ў сілу дыялогу і супрацоўніцтва, адраджаць дыпламатычныя традыцыі і раскрываць свой асобасны і прафесійны патэнцыял. 

Да студэнтаў і прафесарска-выкладчыцкага складу БДУ звярнуліся таксама рэктар БДУ Андрэй Кароль, Пастаянны каардынатар ААН у Беларусі Расул Багіраў і Віктар Гайсёнак, які займаў пасады намесніка Міністра замежных спраў Рэспублікі Беларусь (2005–2008 гг.), Надзвычайнага і Паўнамоцнага Пасла ў Аўстрыі (2000–2005 гг.) і Польшчы (2008–2014 гг.).

Удзельнікі мерапрыемства сумесна са студэнтамі змадэлявалі спецыяльнае пасяджэнне Эканамічнага і Сацыяльнага Савета ААН (ЭКАСАС) пад старшынствам Міністра замежных спраў Беларусі, прымеркаванае да 40-годдзя аварыі на Чарнобыльскай АЭС. Па выніках пасяджэння была аднагалосна прынята рэзалюцыя «Міжнароднае супрацоўніцтва ў справе змякчэння наступстваў аварыі на Чарнобыльскай атамнай электрастанцыі».

У мерапрыемстве таксама ўзялі ўдзел члены Асацыяцыі ветэранаў МЗС Беларусі, многія з якіх зрабілі значны ўнёсак у рэалізацыю мэт шматбаковай дыпламатыі нашай краіны.