Парадак бязвізавага ўезду для грамадзян Літвы, Латвіі і Польшчы

З 15 красавіка 2022 г. уведзены бязвізавы парадак уезду ў Беларусь для грамадзян Латвіі (а таксама асоб, якія маюць статус неграмадзяніна Латвіі) і Літвы, з 1 ліпеня 2022 г. – дадаткова для грамадзян Польшчы. Бязвізавы парадак уезду для грамадзян гэтых дзяржаў будзе дзейнічаць да 31 снежня 2023 г.

Грамадзяне Літвы і грамадзяне (неграмадзяне) Латвіі могуць рухацца (уязджаць і выязджаць) праз міжнародныя пункты пропуску толькі на беларуска-літоўскім і беларуска-латвійскім участках мяжы. Грамадзяне Польшчы могуць уязджаць у Беларусь і выязджаць з яе праз любы беларускі міжнародны пункт пропуску на мяжы з ЕС.

Скарыстацца бязвізавым парадкам уезду можна неабмежаваную колькасць разоў. Колькасць дзён знаходжання ў Беларусі не павінна перавышаць 90 дзён у каляндарным годзе.

Для перасячэння мяжы без візы неабходна прадставіць наступныя дакументы:

• сапраўдны дакумент для выезду за мяжу

• зялёная карта (пры руху на аўтамабілі)

• поліс медыцынскага страхавання.

Звяртаем увагу, што пры ажыццяўленні транзіту праз Беларусь у трэція краіны неабходна аформіць транзітную візу Рэспублікі Беларусь.