Аб падпісанні Плана сумесных мерапрыемстваў на 2026 год па рэалізацыі Рамачнай праграмы супрацоўніцтва ААН і Беларусі

20 студзеня 2026 г. Міністр замежных спраў Рэспублікі Беларусь Максім Рыжанкоў правёў сустрэчу з Пастаянным каардынатарам ААН у Беларусі Расулам Багіравым і кіраўнікамі агенцтваў сістэмы ААН, прадстаўленых у Беларусі (ПРААН, ЮНІСЕФ, ЮНФПА, СААЗ, УВКБ ААН, МАМ), для падпісання Плана сумесных мерапрыемстваў на 2026 год па рэалізацыі Рамачнай праграмы супрацоўніцтва ААН і Рэспублікі Беларусь у галіне ўстойлівага развіцця на 2026–2030 гады.

Рамачная праграма супрацоўніцтва была падпісана кіраўніком знешнепалітычнага ведамства Беларусі і Пастаянным каардынатарам ААН у Міністэрстве замежных спраў 29 снежня 2025 г.

Суразмоўцы абмеркавалі перспектыўныя напрамкі супрацоўніцтва Беларусі і ААН у рамках рэалізацыі доўгатэрміновых нацыянальных прыярытэтаў, падкрэсліўшы ўзгодненасць Рамачнай праграмы супрацоўніцтва з нацыянальнымі стратэгіямі і планамі сацыяльна-эканамічнага развіцця Беларусі.

Удзельнікі абмяняліся думкамі наконт работы Арганізацыі ва ўмовах сучасных глабальных выклікаў і закранулі пытанне ажыццяўлення праектнай дзейнасці ААН у Беларусі, адзначыўшы яе ўнёсак ва ўстойлівае развіццё дзяржавы. Кіраўнік знешнепалітычнага ведамства Беларусі падкрэсліў у гэтай сувязі значнасць рэалізацыі практыка-арыентаваных праектаў і выказаў гатоўнасць да далейшага пашырэння ўзаемадзеяння на гэтым напрамку.

Па выніках сустрэчы бакі пацвердзілі ўзаемную зацікаўленасць у паглыбленні партнёрства Беларусі і ААН, а таксама працягу сумесных намаганняў у інтарэсах устойлівага развіцця нашай краіны.

План сумесных мерапрыемстваў распрацаваны МЗС сумесна з Краінавай камандай ААН і ўключае мерапрыемствы, якія пройдуць у краіне ў 2026 годзе і будуць прысвечаны знакавым падзеям на нацыянальным узроўні і міжнародным дням. У План увайшлі мерапрыемствы, прымеркаваныя да Года беларускай жанчыны, па чарнобыльскай праблематыцы і пытаннях міру і развіцця, у тым ліку ў кантэксце распрацоўкі Еўразійскай хартыі разнастайнасці і шматпалярнасці ў XXI стагоддзі. Таксама ў яго ўвайшлі традыцыйныя мерапрыемствы, прымеркаваныя да важных гістарычных вех стварэння Арганізацыі – пачатку Сан-Францыскай канферэнцыі (25 красавіка), падпісання Статута ААН (26 чэрвеня), Дня ААН (24 кастрычніка).

версія для друку