Аб навучальным семінары-практыкуме для маладых дыпламатаў, студэнтаў і выкладчыкаў профільных устаноў вышэйшай адукацыі

1 снежня 2025 г. Першы намеснік Міністра замежных спраў Рэспублікі Беларусь Сяргей Лукашэвіч адкрыў навучальны семінар-практыкум для маладых дыпламатаў, студэнтаў і выкладчыкаў профільных вышэйшых навучальных устаноў.

Традыцыйнае для МЗС мерапрыемства ў гэтым годзе праходзіць з 1 па 5 снежня 2025 г. і праводзіцца ўжо ў 18-ы раз. У ім удзельнічаюць маладыя супрацоўнікі МЗС са стажам працы да аднаго года, студэнты выпускных курсаў профільных факультэтаў беларускіх ВНУ (БДУ, БДЭУ, БДУЗМ, АУпПРБ), пераможцы прафарыентацыйнага конкурсу «хачу быць дыпламатам», а таксама ўдзельнікі валанцёрскага руху МЗС.

Усяго – каля 80 чалавек.

Для слухачоў арганізаваны сустрэчы з запрошанымі экспертамі-прадстаўнікамі дзяржаўных органаў, нацыянальных СМІ, а таксама кіраўнікамі і аналітыкамі Беларускай гандлёва-прамысловай палаты (БелГПП) і Беларускага інстытута стратэгічных даследаванняў (БІСД). У праграме таксама ўдзельнічаюць прадстаўнікі Міністэрства абароны і вядучых галіновых арганізацый.

Тэматыка заняткаў ахоплівае шырокі спектр пытанняў: гісторыю дыпламатыі, сучасныя напрамкі знешняй палітыкі Рэспублікі Беларусь, міжнароднае супрацоўніцтва ў палітычнай, эканамічнай, гуманітарнай, інфармацыйнай і іншых сферах. Удзельнікі наведаюць Цэнтр гісторыі МЗС і беларускай дыпламатычнай службы.

Адкрываючы семінар, Сяргей Лукашэвіч адзначыў, што МЗС зацікаўлены ў моладзі, гатовай уносіць свой уклад ва ўмацаванне міжнароднага аўтарытэту краіны:

«Для вас семінар – гэта магчымасць не проста пачуць аб працы МЗС, але і ўбачыць, як будуецца дыпламатыя ў рэальным часе. Гэта ваш шанец зразумець, ці гатовыя вы звязаць сваю будучыню са знешнепалітычнай службай», – заявіў ён.

Першы намеснік міністра падкрэсліў, што МЗС і далей будзе далучаць маладых міжнароднікаў да праектаў Міністэрства, у тым ліку да валанцёрскіх ініцыятыў і ўдзела ў знакавых мерапрыемствах:

«Мы імкнемся падтрымліваць маладых людзей, якія праяўляюць цікавасць да дыпламатыі. Конкурс "хачу быць дыпламатам" і наша валанцёрская праграма – добрыя прыступкі для тых, хто разглядае кар'еру ў МЗС як сур'ёзную перспектыву», – дадаў С.Лукашэвіч.

версія для друку