Выступленне Пастаяннага прадстаўніка Беларусі Л.Бельскай у рамках Інтэрактыўнага дыялогу са Спецдакладчыкам па правах мігрантаў (20 чэрвеня 2025 г., г.Жэнева)

Вітаем і дзякуем сп. Мадзі за даследванне і даклад. Падзяляем шматлікія ацэнкі і высновы спецыяльнага дакладчыка.

Нерэгулярная міграцыя спалучана з рызыкамі, якія пагаршаюцца неабгрунтаванай мілітарызацыяй меж і наўмысным адыходам ад міжнародных стандартаў прадастаўлення прытулку. Беларусь сутыкаецца з наступствамі такой палітыкі для мігрантаў на межах з Літвой, Латвіяй, Польшчай.

На беларускай тэрыторыі рэгулярна фіксуюцца ахвяры жорсткага «пушбэка», якія маюць патрэбу ў медыцынскай і іншай дапамозе. Часта з прычыны жорсткага абыходжання мігранты становяцца ахвярамі смерцяў, якія можна было прадухіліць. Так, за апошнія 4 гады задакументавана больш за 80 выпадкаў гібелі мігрантаў, выцесненых на тэрыторыю Беларусі, сёлета больш за 15.

Следчыя органы расследуюць факты гвалту і парушэнні правоў мігрантаў, якія рухаліся транзітам у Еўрасаюз. Паказанні пацярпелых сведчаць, што ў сумежных дзяржавах сфарміраваны фільтрацыйныя пункты, дзе затрыманых асоб збівалі, адбіралі грошы і тэлефоны, а потым выштурхоўвалі на нашу тэрыторыю.

Заклікаем вас трымаць у фокусе ўвагі і належным чынам рэагаваць на выпадкі гібелі людзей на межах ЕС і садзейнічаць спыненню злоўжыванняў і парушэнняў правоў чалавека мігрантаў.

Беларусь зацікаўлена ў супрацоўніцтве са спецыяльным дакладчыкам і гатова да прагматычнага дыялогу з сумежнымі краінамі, у тым ліку для сумесных расследаванняў выпадкаў гібелі і знікненняў.

Разлічваем, што нашыя суседзі адыдуць ад канфрантацыі, праявяць здаровы сэнс і палітычную волю да аднаўлення даверу і супрацоўніцтва ў сферы сумеснага кіравання межамі.

Дзякую за ўвагу.

версія для друку