Аб памятным мерапрыемстве ў МЗС Беларусі да 80-годдзя Вялікай Перамогі

8 мая 2025 г. у Міністэрстве замежных спраў Рэспублікі Беларусь адбылося мерапрыемства, прымеркаванае да 80-годдзя Перамогі савецкага народа ў Вялікай Айчыннай вайне.

Цэнтральнай падзеяй стала адкрыццё выставы мастацкіх работ на ваенную тэматыку з фондаў Нацыянальнага цэнтра сучасных мастацтваў Рэспублікі Беларусь.

У мерапрыемстве прынялі ўдзел кіраўніцтва і супрацоўнікі МЗС Беларусі, ветэраны дыпламатычнай службы, больш за 40 кіраўнікоў дыпламатычных місій і прадстаўніцтваў міжнародных арганізацый, акрэдытаваных у нашай краіне, іншыя ганаровыя госці.

У сваім выступленні Міністр замежных спраў Максім Рыжанкоў, павіншаваўшы прысутных з надыходзячым вялікім святам, нагадаў аб закліку Кіраўніка дзяржавы сумесна падумаць аб тым, «што мы сёння павінны зрабіць для таго, каб сапраўды адвесці свет ад краю прорвы, на якім ён сёння знаходзіцца».

Міністр адзначыў асаблівую ролю дыпламатаў у падтрыманні міру, назваў непрымальнымі спробы знішчэння гістарычнай памяці ў шэрагу дзяржаў, акцэнтаваў асаблівую ролю мастацтва ў захаванні гэтай памяці: «Мастацтва, якое з'яўляецца злучальнай ніткай з тымі падзеямі, дае аснову для абуджэння ва ўсіх нас самых светлых, самых мірных ініцыятыў».

З прывітальным словам выступіў таксама дырэктар Нацыянальнага цэнтра сучасных мастацтваў, вядомы мастак Сяргей Крыштаповіч. Музычную праграму з тэатралізаванымі элементамі прапанавалі студэнты Беларускай дзяржаўнай акадэміі мастацтваў.

Падчас мерапрыемства прысутныя змаглі прадэгуставаць салдацкую кашу з ваенна-палявой кухні.

версія для друку