Паўночнае вымярэнне

Паўночнае вымярэнне (ПВ) ўтворана ў 1997 годзе па ініцыятыве Фінляндыі і з'яўляецца адным з рэгіянальных напрамкаў палітыкі ЕС. З 2006 года, пасля прыняцця Палітычнай дэкларацыі і Рамачнага палітычнага дакумента Паўночнага вымярэння, праект стаў сумеснай палітыкай ЕС, Ісландыі, Нарвегіі і Расіі, якая прадугледжвае раўнапраўны ўдзел усіх чатырох бакоў.

З мая 2015 года Беларусь валодае статусам назіральніка ў Паўночным вымярэнні.

У рамках Паўночнага вымярэння створаны чатыры партнёрства: па экалогіі; транспарце і лагістыцы; ахове здароўя і сацыяльнаму дабрабыту; культуры. Беларусь удзельнічае ў дзейнасці першых двух партнёрстваў.

Экалагічнае партнёрства Паўночнага вымярэння (ЭППВ) створана ў 2002 годзе для вырашэння экалагічных праблем водазабеспячэння, ачысткі сцёкаў, перапрацоўкі цвёрдых адходаў, павышэння энергаэфектыўнасці і ўтылізацыі ядзерных адходаў. Фонд ЭППВ суфінансуюць Еўрапейскі банк рэканструкцыі і развіцця, Паўночны інвестыцыйны банк, Паўночная экалагічная фінансавая карпарацыя, Еўрапейскі інвестыцыйны банк і Сусветны банк.

Да цяперашняга часу наша краіна ўнесла ў фонд ЭППВ 2 млн. еўра. Гэта дазваляе прыцягваць сродкі на рэалізацыю такіх буйных шматгадовых праектаў партнёрства, як “Беларусь: экалагічны інфраструктурны праект” і “Праграма па водным сектары ў Рэспубліцы Беларусь”.

Дзейнасць Партнёрства Паўночнага вымярэння ў галіне транспарту і лагістыкі (ППВТЛ) накіравана на каардынацыю нацыянальных транспартных палітык краін рэгіёну, у тым ліку на правядзенне сумесных мерапрыемстваў. У 2020 годзе Беларусь старшынствуе ў ППВТЛ.