Беларусь-Украіна

Дыпламатычныя адносіны паміж Рэспублікай Беларусь і Украінай усталяваны 27 снежня 1991 г. Пасольства нашай краіны ва Украіне функцыянуе з кастрычніка 1993 г. Між Рэспублікай Беларусь і Украінай падпісана больш 210 двухбаковых міжнародных дагавораў і іншых міжнародна-прававых дакументаў.

Асноватворнымі дакументамі, якія рэгулююць двухбаковае палітычнае і эканамічнае супрацоўніцтва, з'яўляюцца Дагавор аб дружбе, добрасуседстве і супрацоўніцтве, Пагадненне аб свабодным гандлі.

У 2017 годзе праведзены тры сустрэчы на вышэйшым узроўні, у 2018 годзе – адбыўся працоўны візіт Прэзідэнта Украіны ў Беларусь, што паказвае практычную зацікаўленасць дзвюх краін ва ўмацаванні ўзаемавыгадных адносін паміж Рэспублікай Беларусь і Украінай.

11 кастрычніка 2018 г. у Гомелі адбылося чарговае дваццаць шостае пасяджэнне Міжурадавай беларуска-ўкраінскай змешанай камісіі па пытаннях гандлёва-эканамічнага супрацоўніцтва пад кіраўніцтвам сустаршыняў – намесніка Прэм'ер-міністра Рэспублікі Беларусь Ляшэнкі I.В. і Віцэ-прэм'ер-міністра – Міністра рэгіянальнага развіцця, будаўніцтва і жыллёва-коммунального гаспадаркі Украіны Зубко Г.Р.

25 – 26 кастрычніка 2018 г. у Гомелі з поспехам прайшоў першы Форум рэгіёнаў Беларусі і Украіны, у якім узялі ўдзел і кіраўнікі дзвюх дзяржаў.

У 2017 годзе тавараабарот з Украінай склаў 4,59 млрд. долараў, экспарт дасягнуў 3,4 млрд. долараў.

За студзень-лістапад 2018 г. тавараабарот склаў 5,06 млрд. долараў, 

у тым ліку беларускі экспарт – 3,79 млрд. долараў.

Па даручэнні двух прэзідэнтаў беларускім бокам распрацавана дарожная карта па дасягненні у 2019 годзе тавараабароту з Украінай у аб'ёме не менш за 8 млрд. долараў.

Ва Украіне функцыянуе развітая тавараправодная сетка беларускіх экспарцёраў, якая складаецца з больш за сто кампаній. Разгалінаваную сетку дылерскіх структур у рэгіёнах маюць такія флагманы эканомікі Беларусі, як БелАЗ, МАЗ, МТЗ і Атлант.

У 2017 годзе з удзелам беларускага боку былі адкрыты тры кампаніі. У Луцку створана прадпрыемства па зборцы беларускіх тралейбусаў Белкамунмаш. У цяперашні час у Украіне дзейнiчае восем сумесных зборачных вытворчасцей (трактароў, збожжаўборачных камбайнаў, ліфтавага абсталявання, тралейбусаў, тэхнікі МАЗ і інш.). 

Актыўна ажыццяўляюцца сумесныя культурныя праекты. Адной з найбольш значных падзей 2018 года стала правядзенне Дзён культуры Украіны ў Беларусі. У рамках Першага форума рэгіёнаў Беларусі і Украіны быў арганізаваны Канцэрт сяброўства. 

Яркімі падзеямі таксама сталі выступленні ва Украіне заслужанага аматарскага калектыву Рэспублікі Беларусь ансамбля беларускай песні «Церніца»; беларускага тэатральнага праекта «ТрыТформаТ» Тэатра-студыі Кінаакцёра, традыцыйны ўдзел выканаўцаў і творчых калектываў у Міжнародных фестывалях «O-FEST» і ««Карпацкі прастор».