Аб сустрэчы намесніка Міністра замежных спраў Беларусі А.Дапкюнаса з кіраўніком Прадстаўніцтва ЕС у Беларусі
10 кастрычніка 2018 г.10-10-2018
10 кастрычніка 2018 г. адбылася сустрэча намесніка Міністра замежных спраў Рэспублікі Беларусь Андрэя Дапкюнаса з кіраўніком Прадстаўніцтва ЕС у Беларусі Андрэа Віктарын.
Падчас сустрэчы суразмоўцы абмяняліся думкамі аб асноўных падыходах і прыярытэтах Беларусі і Еўрапейскага Саюза на 73-й сесіі Генеральнай Асамблеі ААН.
У ліку прыярытэтаў ЕС А.Віктарын адзначыла прыняцце Генеральнай Асамблеяй ААН распрацаванай ЕС рэзалюцыі аб мараторыі на смяротнае пакаранне.
Да даведкі: Папярэдняя рэзалюцыя па гэтым пытанні была прынята Генеральнай Асамблеяй ААН шляхам галасавання два гады таму. Рэзалюцыю тады падтрымалі тры пятых дзяржаў-сябраў ААН. Супраць яе прыняцця выказаліся 40 дзяржаў, у т.л. Злучаныя Штаты Амерыкі, Індыя, Кітай і Японія. Беларусь пры галасаванні па рэзалюцыі ўстрымалася.
Намеснік Міністра адзначыў важнасць вядзення дыскусіі і распрацоўкі дакументаў Генеральнай Асамблеі ААН па пытанні смяротнага пакарання ў атмасферы некатэгарычнасці, паступовасці і шчырай павагі да меркавання супрацьлеглага боку.
А.Дапкюнас прыцягнуў увагу кіраўніка прадстаўніцтва ЕС у Беларусі да праекта тэхнічнага садзейнічання “Падтрымка намаганняў Рэспублікі Беларусь па нацыяналізацыі і лакалізацыі мэтаў ўстойлівага развіцця”, распрацоўка якога вядзецца беларускім бокам з удзелам шэрагу ўстановаў сістэмы ААН. Намеснік Міністра запрасіў разгледзець магчымасць падтрымкі Еўрапейскім Саюзам гэтага праекта як важнага інструмента спрыяння дасягненню Беларуссю мэтаў устойлівага развіцця.
Намеснік Міністра адзначыў таксама ў якасці прыярытэтнай для Беларусі ініцыятывы працяг прасоўвання ў рамках ААН ідэі падтрымкі намаганняў краінаў з сярэднім узроўнем даходу. А.Дапкюнас інфармаваў А.Віктарын аб правядзенні па ініцыятыве Беларусі ў штаб-кватэры ААН у Нью-Ёрку 4 снежня 2018 году сустрэчы высокага ўзроўню па пытаннях падтрымкі краін з сярэднім узроўнем даходу. Адной з мэт гэтай сустрэчы з’яўляецца пачатак практычнай распрацоўкі стратэгіі супрацоўніцтва ААН з гэтай катэгорыяй краінаў.
Да даведкі: Да катэгорыі краінаў з сярэднім узроўнем даходу належаць больш за палову дзяржаў свету. У іх пражывае каля 70% беднага насельніцтва планеты.
Беларускі дыпламат адзначыў важнасць плануемага мерапрыемства ў кантэксце глабальных намаганняў па спрыянні развіццю і заахвоціў удзел Еўрапейскага Саюза ў гэтай сустрэчы на як мага больш высокім узроўні.
Падчас сустрэчы было таксама працягнутае абмеркаванне прадстаўнікамі МЗС Беларусі і ЕС тэмы ажыццяўлення сумеснага ўсеабдымнага плана дзеянняў у дачыненні ядзернай праграмы Ірану. А.Віктарын інфармавала аб выніках міністэрскай сустрэчы ў верасні ў Нью-Ёрку фармату Е3/EC+2 і ініцыятыве стварэння кампаніі адмысловага прызначэння для аблягчэння плацяжоў, звязаных з экспартна-імпартнымі здзелкамі Ірана. Намеснік Міністра выказаў зацікаўленасць у працягу абмену інфармацыяй па гэтай тэме, у тым ліку ў кантэксце перспектываў аперацыяналізацыі кампаніі адмысловага прызначэння.
русская версия English version
Афіцыйныя інтэрнэт-рэсурсы
Прэзідэнт Рэспублікі Беларусь
www.president.gov.byСавет Міністраў Рэспублікі Беларусь
www.government.gov.byСавет Рэспублікі
www.sovrep.gov.byПалата Прадстаўнікоў
www.house.gov.byМіжнародны ІКТ-Форум ТІБО-2022
www.tibo.byПрававы форум Беларусі
www.forumpravo.byТэлеканал «Беларусь 24»
www.belarus24.byРадыёстанцыя «Беларусь»
www.radiobelarus.byБеларуская універсальная таварная біржа
www.butb.byНацыянальнае агенцтва па турызму
www.belarustourism.byНацыянальнае агенцтва інвестыцый і прыватызацыі
www.investinbelarus.byНацыянальны цэнтр прававой інфармацыі
www.ncpi.gov.byАфіцыйны сайт Рэспублікі Беларусь
www.belarus.by