Што такое СГА?

Сусветная гандлёвая арганізацыя (СГА) – гэта адзіная глабальная міжнародная арганізацыя, якая рэгулюе правілы гандлю паміж сваімі членамі. У яе аснове ляжаць пагадненні СГА, заключаныя, падпісаныя і ратыфікаваныя большасцю краін свету. Правілы СГА з'яўляюцца арыенцірам для распрацоўкі і практычнага прымянення нацыянальнага заканадаўства ў галіне гандлёва-эканамічных адносін.

Асноўная мэта арганізацыі – стабільныя, прадказальныя і свабодныя гандлёвыя патокі паміж сваімі членамі.

СГА з'яўляецца пераемніцай Генеральнай дамовы па тарыфах і гандлю (ГАТТ), якая была падпісана 23 краінамі ў Жэневе ў кастрычніку 1947 года і набыла моц 1 студзеня 1948 года.

ГАТТ пачала лібералізацыю гандлю таварамі шляхам зніжэння імпартных мытных пошлін. На працягу 47 гадоў (да стварэння СГА) асноўны юрыдычны тэкст ГАТТ заставаўся ў тым выглядзе, у якім ён быў прыняты ў 1947 годзе. У дадатак да яго былі прынятыя шматбаковыя пагадненні з абмежаваным колам удзельнікаў.

Афіцыйнай датай стварэння СГА з'яўляецца 1 студзеня 1995 года. У адпаведнасці з Марракешскім пагадненнем аб заснаванні СГА, падпісанным 15 красавіка 1994 года, краінамі-заснавальнікамі арганізацыі сталі 76 удзельнікаў ГАТТ.

Па стане на студзень 2024 г., членамі СГА з'яўляюцца 164 краіны і мытныя тэрыторыі, уключаючы партнёраў Беларусі па Еўразійскім эканамічным саюзе. 24 краіны, у тым ліку Беларусь, маюць статус наглядальніка і вядуць перамовы аб умовах далучэння да арганізацыі.